睇左醫生

因為今日要返眼科覆診，所以咪諗住順手係附近睇婦科
咁打電話去book我想睇既婦科醫生啦，但…
竟然要8月份先有位睇
於是諗住覆診完後求其walk in走入一間婦科醫生睇下有冇得睇算啦

覆完診，係同一座大廈見到醫薈坊有女醫生(因為王生話要女醫生)
於是膽粗粗咁走左上去問可唔可以就咁walk in入黎睇
咁接待處的姑娘問左話可以，不過可能會耐啲
(唔知係唔係冇book啦，態度唔算好囉，口黑面黑咁)
王生話冇問題，只要可以睇就ok
咁我地咪等囉，個接待處姑娘俾左張紙話我去廁所all尿整濕佢啦
咁整濕左紙啦，俾個姑娘睇啦，佢雙手繞埋，叫我轉一轉俾佢睇就叫我扔左張紙
佢好似慌死好烏糟咁，張紙有個透明膠袋裝住架，唔會整濕對手~

咁之後坐係度等啦
感謝主，唔駛等到好耐就睇到啦~
入到去循例問下係咪第一胎阿？之前有冇流產或墮過胎阿之類既問題啦~
之後就話咁照一照啦，叫我除褲，係張凳度坐低，然後問左個我地覺得好白痴的問題囉~
佢問︰「你係自然有唔係人工授孕架呵！」
講真，如果我係人工授孕的話，我本身都有一個醫生跟進啦，仲駛鬼睇你咩
之後照陰道超聲波啦，佢就話可能仲係太早，未照到，不過子宮係脹大左
照完後，佢就叫我再驗多次孕睇吓係唔係真係有左
去完廁所，俾返個膠樽俾佢驗，我地就出面等啦
等左一陣，佢叫返我個名入去啦~
點知佢第一句就同我講︰「好奇怪喎，你之前話驗到有，但我咁睇又唔覺你有左，我唔可以肯定你係唔係有左！」

嘩，聽到佢咁講，我地當堂呆左囉
之後佢又話可能係太早期啦，又或者我之前飲左水沖淡左(我之前真係飲左好多水)，所以驗唔到
跟住佢叫我地兩星期後再返黎照過，如果係有左的話，到時應該可以照到架啦
唔駛講，聽到佢咁講，我同王生梗係灰晒啦，冇晒心機
唯有book兩個星期後返黎再照啦~最後埋單差唔多成一千蚊囉

跟住我地行去搭巴士返屋企啦
我諗諗吓同王生講，不如我地再買多2枝棒棒驗啦，仲要買2隻唔同牌子，咁如果都係驗到有就係有啦，唔駛好似宜家咁擔心，不安阿~
冇理由4隻牌子都話有時仲係假架，而且唔通4隻牌子都咁好彩壞左，有問題架
落左巴士，拿拿臨去屈臣氐買2枝棒棒返屋企驗啦~
結果都係好快咁出左條線出黎~

之後上網睇網友對果個醫生的評價，發現好壞參半啦
王生就話唔好再睇佢囉，佢都唔能夠令病人安心，反而搞到病人擔心到死
而且王生話見到佢幫我驗果枝驗孕棒係有條好淺既線出現，但佢就話睇唔到有線囉！
我都覺得唔想再去睇佢囉，於是決定再搵過另一個婦科醫生睇~

對，醫薈坊個女醫生叫王培儀，大家可以自行決定睇唔睇佢
不過我會同朋友講最好唔好去睇佢囉~